Ministri Limaj u takua me kongresistët Eliot Engel dhe Jim Himes,zyrtarë të lartë të Bankës Botërore dhe ata të organizatës OPIC

Ministri Limaj sot pati takime të veçanta në Kongresin Amerikan, me Kongresmenin dhe mikun e Kosovës z.Eliot Engel dhe Kongresmenin Jim Himes.

Në një bisedë të gjatë e miqësore me Kongresistin Engel e poashtu edhe gjatë takimit me Kongresistin Himes, Ministri Limaj i njoftoi kongresistët me gjendjen aktuale, politike dhe ekonomike në Kosovë, problemet dhe sfidat me të cilat po ballafaqohet Kosova si shtet i ri poashtu për zhvillimin ekonomik të vendit si dhe për rrugën që duhet ndjekur për të hapur perspektiva të zhvillimit të vendit tonë.

Ministri Limaj falenderoi posaqërisht zotin Engel për angazhimin e tij personal në realizimin sa më të shpejt të projektit të autostradës. Poashtu Ministri Limaj gjeti mbështetje nga Kongresmeni Engel që tani e tutje të angazhohemi së bashku që Kosova sa më shpejt të ketë kodin  e saj telefonik dhe domenin e internetit.

Kongresmeni Eliot Engel e poashtu edhe Kongresmeni Jim Himes vlersuan punën që po bëjnë Institucionet e Republikës së Kosovës dhe Ministria e Transportit në ndërtimin dhe zhvillimin e infrastrukturës rrugore dhe transportit.

Gjatë vizitës së tij ne SHBA, ministri Limaj u takua edhe me përfaqësuesit e Bankës Botërore, me zyrtarët e lartë të këtij institucioni z. Richard Martin Humphreys dhe z. Henry Kerali.

Ministri Limaj në emër të Qeverisë së Republikës së Kosovës falenderoi për ndihmën që Banka Botërorë po i jep Institucioneve të Kosovës e sidomos për asistencën e dhënë nga Banka Botërore për MTPT-në. Ministri Limaj shprehu nevojën dhe kërkoi ndihmën e Bankës Botërore për investime në sektorin e infrastrukturës rrugore dhe Transportit në Kosovë.

z. Humphreys dhe z Kerali thanë se “Banka Botërore ka qenë dhe do të jetë edhe më tutje aktive në ndihmesë për MTPT-në

 “Ne do të vazhdojmë të punojmë me Ministrinë e Transportit për të siguruar dhe ofruar ndihmën tonë dhe asistencën më të mirë të mundshme, sidomos në projektin e autostradës Morinë-Merdare. Sipas tyre, autostrada është një projekt i madh dhe do të përkrahet sa më shumë që është e mundur.”

Në takimin e Ministrit Limaj me zyrtarët e lartë të  Organizatës Amerikane OPIC (Overseas Private Investment Corporation, OPIC është një agjenci e Qeverisë amerikane që u ndihmon bizneseve amerikane duke u ofruar shërbime në investimet e tyre jashtë vendit).

Ministri Limaj e mirëpriti dhe vlerësoi angazhimin e OPIC për zgjerimin e bashkëpunimit dhe investimet e mundshme të tyre në Kosovë. Ministri Limaj kërkoj nga OPIC mbështetjën financiare dhe teknike për strukturën dhe realizimit më të mirë të projektit për ndërtimin e Autostradës Morinë Merdare.

Zyrtarët e lartë të OPIC-ut premtuan ministrit angazhimin e tyre maximal për ndihmë Qeverisë së Kosovës në sektorin e infrastrukturës rrugore.